Bu gün Naqasaki faciəsinin 70-ci ildönümü qeyd edən atom məsələsi yaponlar üçün hələ də aktual olaraq qalır. Məlumata görə, Yaponiyanın cənubunda Senday Atom-Elektrik Stansiyasının yenidən işə salınmasına qarşı etiraz aksiyası keçirilib.
2011-ci ilin martında güclü zəlzələ və sunami nəticəsində Fukusima nüvə fəlakətindən sonra ölkədəki bütün atom-elektrik stansiyalarının fəaliyyəti dayandırılmışdı. Əgər işi bərpa olunarsa, Senday Atom-Elektrik Stansiyası Fukusima fəlakətindən sonra tətbiq edilən yeni təhlükəsizlik qaydaları çərçivəsində işə salınan ilk nüvə reaktoru olacaq.
Xatırladaq ki, 1945-ci ilin 9 avqustunda Amerika Birləşmiş Ştatları aviasiyası tərəfindən Naqasaki şəhərinə atılan atom bombası partlayışının dəhşəti yad olunur. Atom bombası partlayışı qurbanlarının xatirəsi 1 dəqiqəlik sükutla yad edilib. 1 dəqiqəlik sükut atom bombasının atıldığı saata, yəni səhər 11:02-ə təsadüf edib.
1945-ci ilin avqustunda İkinci Dünya müharibəsinin sonuna yaxın avqustun 6-da Hirosima şəhərinə, avqustun 9-da isə Naqasaki şəhərinə atom bombaları atılmışdı. Bu hadisələr Yaponiyanın müharibədə təslim olması ilə nəticələnmişdi. Atom partlayışları nəticəsində Yaponiyada Hirosimada 140 mindən çox, Naqasakidə isə 70 mindən çox adam həlak olmuşdu. Uzun illər ərzində radiasiya nəticəsində yüz minlərlə insan sonradan şikəst olmuş, körpələr şikəst və ya ölü doğulmuşdu. /anspress/
