Ağsu rayonunda orta məktəb direktoru işçisini döyüb. Məlumata görə, bu barədə zərərçəkən polisə şikayət edib.
Hadisə Keçdiməz kəndinin orta məktəbində qeydə alınıb. Qadın şikayətində deyib ki, orta məktəb direktoru Maarif Səmədov işə hecikdiyi üçün onu vurub. Rayon polis şöbəsindən qadının şikayətinin araşdırıldığını bildiriblər.
Hadisə ilə bağlı məktəb direktorunun özü ilə əlaqə saxladıq. Maarif Səmədov açıqlamasında qadını döymədiyini bildirib. Onun sözlərinə görə, xadiməyə sadəcə qışqırıb və onun qolundan tutub.
"Mənim 60 yaşım var. Rəsiqə mənim şagirdim olub. Dəfələrlə işə gecikirdi. Dedim izahat yaz. İmtina etdi. Ərklə qolundan tutdum və qışqırdım. Allaha and olsun ki, onu vurmamışam. Bu yaşda mənə yaraşmaz".
Rayon Təhsil Şöbəsinin rəis müavini Adil Kərimovun verdiyi məlumata görə, hadisə barədə xəbərdardırlar.
"Hazırda araşdırma aparırıq. Məktəb direktoru və xadimə üzləşdiriləcək. Araşdırmalardan sonra hadisənin əsil mahiyəti məlum olacaq".
Təhsil Nazirliyindən də hadisənin araşdırıldığını bildirdilər. Nazirliyin mətbuat xidmətinin rəhbəri Cəsarət Valehovun verdiyi məlumata görə, əgər şikayət təsdiqini taparsa, məktəb direktoru şiddətli şəkildə cəzalandırılacaq./anspress/
