Ötən il Braziliya hökuməti ilə problemlər yaşayan ani mesajlaşama sistemi olan "WhatsApp" yenidən çətinlik yaşayıb. "İhlas"-a istinadla verilən məlumata görə, mart ayının 1-də "Facebook"un Latın Amerika bölməsinin rəhbəri Argentine Dieqo Dzodan sosial şəbəkəyə aid olan mesajlaşma xidməti "WhatsApp" istifadəçilərinin məlumatlarını polislə paylaşmaq istəmədiyi üçün tutulmuşdu.
Dzodan mütəşəkkil cinayətkar dəstə və narkotik qaçaqmalçılığı ilə bağlı aparılan araşdırmaya kömək etməməkdə, verilən qərara riayət etməməkdə ittiham edilmişdi. Lakin o, bir gün sonra azad edilmişdi.
Bu hadisələrlə bağlı olaraq ölkənin şimal-şərqindəki Sergipe vilayətindən olan Marsel Maia Montalvao adlı hakim mesajlaşma sisteminin bu səhərdən etibarən bütün ölkə ərazisində 72 saat müddətinə yasaqlanması barədə qərar qəbul edib.
Argentine Dieqo Dzodan - "Facebook"un Braziliya rəhbəri
Smartfonlar üçün ani mesajlaşma mübadilə sistemi olan "Whatsapp", demək olar ki, artıq ən çox istifadə olunan ünsiyyət vasitələrindəndir. Bu sistem həyatımızın ayrılmaz hissəsinə çevrilib desək, yanılmarıq. Sistem "Facebook" tərəfindən satın alındıqdan sonra bir çox yeniliklər edilib, fəaliyyəti daha da genişlənib.
Bu mesajlaşma sisteminin Braziliyada qarşılaşdığı ilk hadisə deyil. Məlumata görə, ötən ilin dekabrında da "Whatsapp" Braziliyada 48 saat müddətinə qadağan edilib. Mesajlaşma sisteminin Braziliya kimi böyük ölkədə qapadılmasına səbəb isə onun əməkdaşlıq təklifini rədd etməsi olub. San Paulo şəhər məhkəməsi aparılan irimiqyaslı araşdırma çərçivəsində əməkdaşlıq etmək tələbini irəli sürüb. Lakin ona "yox" cavabı verilib.
İki gün sonra bu gün istifadəsinə icazə verilən "Whatsapp" əsl şokla üzləşib. Belə ki, şirkət rəsmiləri 48 saat ərzində yüzminlərlə istifadəçisini itirib.
"WhatsApp"ın yaradıcıları Brayan Əkton və Cem Koum
“WhatsApp” smartfonlar üçün ani mesajlaşma mübadilə sistemidir. Mətn mesajlarını, təsvirləri, videonu və audionu göndərməyə imkan verir. Messenceri yaratmış şirkətin 2009-cu ildə Cen Koum və Brayan Akton tərəfindən əsası qoyulub. Şirkətin mərkəzi ofisi Santa-Klara Kaliforniya ştatında yerləşir.
Bir neçə il öncə bu sistem "Facebook" tərəfindən satın alınıb. Məhz bundan sonra sistemdə bir çox yeniliklər edilib, hazırda istifadəçi sayı milyonlarladır./anspress/
