Türkiyənin cənub-şərqində güclü partlayış baş verib. Məlumata görə, hadisə nəticəsində iki hərbçi həlak olub, üç nəfər yaralanıb. Hadisə ölkənin cənub-şərqindəki Mardin vilayətinin Nusaybin şəhərində əldəqayırma bombanın partlaması nəticəsində baş verib.
Hərbi qurumların verdiyi məlumata görə, partlayıcı qurğu Türkiyədə qadağan olunmuş PKK üzvlərinə qarşı antiterror əməliyyatlarının keçirilməsi zamanı işə düşüb.
Türkiyədə 2015-ci ilin iyulunda PKK ilə silahlı münaqişənin təsdiqindən sonra kürd üsyançıları ilə toqquşmalarda 400 nəfərə yaxın hərbçi və polis əməkdaşları həlak olub.
Türkiyə prezidenti Rəcəb Tayyib Ərdoğanın sözlərinə görə, bu müddət ərzində 5 mindən artıq kürd üsyançıları məhv edilib.
Türkiyə və PKK arasında gərgin münasibətlər uzun illərdir ki, davam edir. Türkiyədə PKK-a qarşı tez-tez əməliyyatlar həyata keçirilir. Onlardan bir bu ilin fevral ayında olub.
Türkiyənin iki vilayətində keçirilən əməliyyatlar nəticəsində PKK terror təşkilatına ağır zərbələr vurulub. Türkiyə Silahlı Qüvvələrinin əməliyyatları Şırnak vilayətinin Cizrə şəhərində və Diyarbəkir vilayətinin Sur şəhərində həyata keçirilib.
Türkiyə Silahlı Qüvvələrindən Cizrədəki terror hücumundan sonra çıxan qarşıdurmada ölü ələ keçirilən terroçu sayının 5 olduğu bildirilib. Diyarbəkirin Sur şəhərində isə terror təşkilatının 3 nöqtədə saxladığı sursat və silahlar ələ keçirilib. Ələ keçənlər arasında uzunlüləli silahlar, qumbaraatanlar və bomba qurğuları olub.
Surda ələ keçən sursatlar
PKK - Kürdüstan Fəhlə Partiyası Abdullah Öcalan tərəfindən 27 noyabr 1978-ci ildə yaradılan ilk illərdə milli təmayüllü marksist-leninist əsaslı olmuş sonradan isə marksizmdən rəsmi şəkildə uzaqlaşmış terror təşkilatıdır. Təşkilat kürdlərin sıx məskunlaşdığı Türkiyənin cənub-şərqində müstəqil kürd dövləti yaratmağı qarşısına məqsəd qoymuş və 1984-cü ildən etibarən Türkiyə dövlətinə qarşı hərbi əməliyyatlar təşkil etməyə başlayıb./anspress/
