Türkiyənin Bitlis şəhərinə PKK hücumu 4 əsgərin yaralanması ilə nəticələndi.
Məlumata görə, Türkiyənin Hizan rayonunda yerləşən hərbi hissəyə PKK terror hücumu olub. Silahlı hücum nəticədə 4 əsgər xəsarət alıb, 6 terrorçu isə zərərsizləşdirilib. Yaralı əsgərlər dərhal Tatvan Əsgər Xəstəxanasına çatdırılıblar. Vəziyyəti ağır olan bir əsgər ilkin müdaxilədən sonra Van şəhərinə gətirilib.
Qaçan terrorçuların tutulması üçün bölgədə havadan əməliyyatlara başlanılıb.
İki gün ərzində PKK silahlıların hücum etdikləri ərazilər
Bu gün ayrı-ayrı vaxtlarda Türkiyənin Osmaniyə, Qaziantep və
Van şəhərlərində polis bölmələri də PKK terrorçularının hücumuna məruz qalıb.
Osmaniyə şəhərində terrorçular patrul vəzifəsi icra edən xüsusi hərəkat polislərinə hücum ediblər. Ölən və yaralananların olmadığı hadisənin ardından qısa müddətli qarşıdurma yaşanıb. Bölgəyə dəstək üçün hərbçilər göndərilib və əməliyyat başlayıb.
Eyni zamanda, PKK terrorçuları Qaziantep şəhərində polis bölməsini atəşə tutublar. Bölmənin yaxınlığında terrorçulara məxsus avtomobildə silah-sursat aşkar edilib. Hazırda hücumu törətməkdə şübhəli bilinən 3 nəfərin yaxalanması istiqamətində əməliyyat-axtarış tədbirləri həyata keçirir.
Vanda isə polis avtomobilinin minaatanlardan atəşə tutulması nəticəsində 2 nəfərin yaralandığı bildirilir. Hücumu törədən PKK silahlılarının tapılması üçün genişmiqyaslı əməliyyat hazırlanıb./anspress/
