8 dekabr 2021-ci il tarixində Azərbaycan elminə ağır itki üz vermişdir. AMEA-nın Arxeologiya, Etnoqrafiya və Antropologiya İnstitutunun nəzdində Antropologiya Mərkəzinin baş elmi işçisi, tarix elmləri doktoru Aydın Balayev vəfat etmişdir.
Qazeta.info Milli Elmlər Akademiyasının məlumatına əsasən bildirir ki, Aydın Hüseynəli oğlu Balayev 19 noyabr 1956-cı ildə Bakı şəhərində anadan olmuşdur. O, 1980-ci ildə Bakı Dövlət Universitetinin Tarix fakültəsini bitirmiş, 1982-ci ildən AMEA-nın Tarix İnstitutunun Arxeologiya və Etnoqrafiya sektorunda çalışmağa başlamışdır. 1988-ci ildə namizədlik, 2001-ci ildə isə doktorluq işini müdafiə etmişdir.
Aydın Balayevin Azərbaycan etnoqrafiya elminin inkişafında müstəsna rolu olmuşdur. Tədqiqat işlərinin nəticələri tərtib etdiyi elmi hesabatlarda, 100-ə yaxın elmi əsərdə, bir neçə monoqrafiyada öz əksini tapmışdır.
Aydın Balayevin xatirəsi onu sevənlərin və tələbələrinin qəlbində daim yaşayacaqdır.
AMEA-nın Arxeologiya, Etnoqrafiya və Antropologiya İnstitutunun rəhbərliyi və əməkdaşları mərhumun ailə üzvlərinə və yaxınlarına dərin hüznlə başsağlığı verir, kədərlərini bölüşdüklərini bildirirlər.
Allah rəhmət eləsin!
