Bu gün Tərtərdə məhbus özünü müvəqqəti saxlama kamerasından asıb. Onun ölümündə qohumları polisi günahlandırır.
ANS TV-nin məlumatına görə, hadisə bu gün axşam saatlarında baş verib. Əslən Ağdam rayonundan olan Səbuhi Dünyamalıyev ötən ayın 12-də Tərtər polisi tərəfindən saxlanılıb. Yaxınları bu gün Səbuhinin ölüm xəbərini alıb. Onun ölümündə polisi günahlandıran qohumları buna etiraz olaraq Tərtər Rayon Polis Şöbəsinin qarşısına toplaşıb.
“Xəbər gəldi ki, özünü asıb. Bunun nadzoru hara baxırdı. KPZ-nin rəisi hara baxırdı. Rayonun rəisi hara baxırdı”, – deyə mərhumun qohumu Əlövsət Dünyamalıyev şikayətlənir.
Mərhumun bacısı Süsən Dünyamalıyeva: "Döymüşdülər, qara ciyərini partlatmışdılar. Dərman aldıq verdik. Bura təcili yardım çağırıldı. Gəncəyə apardılar. Gəncədən qaytardıqları bir saat deyil öldü. Görüblər vəziyyəti ağırdı, yalandan özünü asıb dedilər”.
Tərtər Rayon Prokurorluğundan əldə etdiyimiz məlumata görə, 33 yaşlı Səbuhi Dünyamalıyev narkotik vasitələrin qanunsuz satışına görə saxlanılıb. Bu gün istintaqın gedişiylə bağlı Gəncə şəhərindən Tərtər rayon polis şöbəsinə etap olunub. Axşam saatlarında isə PŞ-nin müvəqqəti saxlama kameralarından birində özünü mələfə ilə asaraq intihar edib. Hazırda meyit Məhkəmə Tibbi Ekspertiza və Potoloji Anatomiya Birliyinin Tərtər rayon şöbəsinədədir.
Faktla bağlı araşdırmalara başlanılıb. Bərdənin Zümürxan kəndi məskunlaşıbmış. İki azyaşlı övladı var.
Tərtər Polis Şöbəsinin növbətçi hissəsindən ANS PRESS-ə verilən məlumata görə, hazırda rayonda vəziyyət tam nəzarətdədir. Və polislə hər hansı bir qarşıdurma halı olmayıb.
