Prezident İlham Əliyevin qərarı ilə iki generalın vəzifədən uzaqlaşdırıldığı bildirilir.
Qazeta.info “Qafqazinfo”-ya istinadla bildirir ki, bu barədə hərbi ekspet Üzeyir Cəfərov məlumat yayıb.
Ü.Cəfərov qeyd edib ki, Ali Baş Komandan İlham Əliyevin qərarına əsasən Cəmşid Naxçıvanski adına Hərbi Liseyin rəisi general-mayor Mirzə Almasov yol verdiyi ciddi qanun pozuntularına və nöqsanlara görə tutduğu vəzifədən azad edilib.
Həmçinin Silahlı Qüvvələrin Baş Hərbi İnspeksiyasının rəisi, Azərbaycanın Milli Qəhrəmanı, general-mayor Fəxrəddin Cəbrayılovun da tutduğu vəzifədən kənarlaşdırıldığı bildirilr.
Qeyd edək ki, bir neçə gün öncə Müdafiə Nazirliyinin Baş Hərbi İnspeksiyasının Hərbi Hava Qüvvələri şöbəsinin baş zabitləri - 1974-cü il təvəllüdlü Seymur Sahib oğlu Ağayev və 1973-cü il təvəllüdlü Ələsgər Mail oğlu Musayev Cinayət Məcəlləsinin 311.3.1-ci (rüşvət alma – qabaqcadan əlbir olan bir qrup şəxs və ya dəstə tərəfindən törədildikdə), inspeksiyanın planlaşdırma şöbəsinin baş zabiti, 1976-cı il təvəllüdlü Rövşən Mikayıl oğlu Məmmədli isə Cinayət Məcəlləsinin 311.3.3-cü (rüşvət alma - külli miqdarda törədildikdə) maddələri ilə təqsirləndirilib.
Onların hər biri təqsirləndirilən şəxs qismində cəlb edilməklə barələrində məhkəmənin qərarı ilə 4 ay müddətinə həbs qətimkan tədbiri seçilib.
"Qafqazinfo" məlumatı dəqiqləşdirmək üçün Müdafiə Nazirliyinə müraciət edib. Bildirilib ki, yaxın saatlarda bununla bağlı rəsmi açıqlama veriləcək.
