Əvvəllər gimnast olan İrlandiyalı Nataşa MakManus iki dəfə dirsəyi çıxandan,  qırılandan, dizi əziləndən sonra belə qərara gəlir ki, gimnastika onun idmanı deyil. 

O, İrlandiyadan Böyük Britaniyaya, ölkənin ən tanınmış dalğıcı Tom Deylinin yanına köçüb. Və bu idmanda Nataşa doğrudan da uğurlar əldə edib. 

Bazar günü Bakı Su İdmanı Mərkəzində MakManus qadınların 3 metrlik tramplin üzrə finalına vəsiqə qazanmaq üçün özünün "son dövrdəki ən yaxşı çıxışını" edib. O, ilkin raundu 10-cu yerdə bitirib. 

Doğrudan da, bilmirdim hansı nəticəni gözləyim. Mən ilk 15 yerə düşəcəyimə ümid edirdim. Buna görə də, nəticədən razıyam. Bu, mənim son vaxtlarda ən yaxşı nəticəmdir.-Nataşa Makmanus

O, suya tullanma idmanına 10 yaşında keçib. Həmin vaxta qədər onun sağ qolu iki dəfə çıxıb və sonda qırılıb. 

"Mən gimnastika ilə məşğul olarkən dizimi də zədələmişdim. Suya tullanmanı sınamağa qərar verdim və bu idman xoşuma gəldi. Gimnastika suya tullanma idmanı üçün təməl oldu. Mən, təxminən 14 yaşımda Plimuta köçdüm, ilk vaxtlar çətin idi, amma mən suya tullanma ilə məşğul oldum və çoxlu dostlar qazandım", - deyə Nataşa açıqlayıb.

MakManusun Bakıdakı çıxışını valideynləri Cenni və Terri də izləyiblər.

Böyük Britaniya komandasının üzvləri Katerin Torans və Lidiya Rozental bazar günü müvafiq olaraq 200.55 və 200.45 xalla birinci və ikinci yerlərdə finala vəsiqə qazandılar.