2014-cü ildə Türkiyənin Niyde şəhərində 3 nəfərin ölümü, 8 nəfərin yaralanması ilə nəticələnən qanlı terror aktı törədən İŞİD üzvlərinin məhkəməsi keçirilib.
Məlumata görə, məhkəmədə terrorun təşkilatçılığında iştirak edən azərbaycanlı İŞİD üzvü Fuad Mövsümov da mühakimə olunub.
Fuad Mövsümov terror qruplaşmasına üzv olma və rəsmi sənədlərdə saxtakarlıq etmə maddələri ilə ittiham olunub. O, barəsində qaldırılan ittihamları qəbul etməyib. “Günahsız insana cəza verməklə itirilən ədaləti bərpa etmək mümkün deyil. Mənə qarşı anlayışlı olun”, - deyə Mövsümov bildirib.
İŞİD-in Türkiyədə ilk qanlı terror aktı olan bu hadisəyə görə Fuad Mövsümovdan başqa 3 nəfər həbs olunub, 9 nəfər isə şübhəli şəxs qismində dindirilib.
Proses zamanı Məhəmməd Zakiri və Çendirim Ramadani susmaqla kifayətlənsə də xarici ölkə vətəndaşı Benyamin Xu deyib ki, onu öz evlərinə aparmaq adı ilə aldadıblar. “Mən heç kimi öldürməmişəm, həmin vaxt uşaq idim”, - deyə Benyamin Xu bildirib.
Fuad Mövsümov - İŞİD üzvü
İŞİD üzvü olduğu təsdiqlənən müttəhimlər Benyamin Xu 179 il 6 ay və 225 min TL (161 min 640 manat), Çendirim Ramadani 174 il 6 ay və 225 min TL (161 min 640 manat), Məhəmməd Zakiri 124 il 6 ay və 225 min TL (161 min 640 manat), azərbaycanlı Fuad Mövsümov isə 13 il 9 ay həbs cəzası alıblar. Ötən ilin fevral ayında keçirilən məhkəmə zamanı Fuad Mövsümovla yanaşı Qoşqar İsmayılov da terroru törətməkdə günhlandırılaraq mühakimə olunurdu. Amma son proses zamanı Qoşqar İsmayılovun adı çəkilməyib.
İŞİD Türkiyədə ilk qanlı terror aktını 2014-cü il martın 20-də törədib. Benyamin Xu, Çendirim Ramadani, Məhəmməd Zakiri Ulukışla-Adana yolunda taksi saxlamaq istəyən təhlükəsizlik əməkdaşlarına avtomatdan atəş açıblar. Bu zaman terrorçular polislər Adil Kozanoğlu və Adəm Çobanı güllələyərək öldürüb, 7 əsgər və avtobusdakı 1 nəfəri yaralayıblar. Sonra ələ keçirdikləri yük maşınının sürücüsü Turan Yaşarı da öldürərək qaçıblar. Terrorçuların ikisi xəstəxanada, digəri isə Köşkönü kəndində yaxalanıb./anspress/
