Azərbaycanda şəhid, əlil,Milli Qəhrəman, aztəminatlı ailələrdən məktəbə gedən uşaqlar pulsuz məktəbli forması ilə təmin oluna bilər. Bunun üçün şəhid,əlil və aztəminatlı ailələr məktubla "Azərbaycan Valideyn-Müəllim Assosiasiyası” İctimai Birliyinə müraciət etməlidirlər. Bu barədə məlumatı "Bakı Tikiş Evi”nin (BTE) Satış şöbəsinin rəisi Etibar Əzimov verib. E. Əzimov bildirib ki, hər il olduğu kimi, bu il hələki nə qədər sayda ailənin uşaqlarına BTE tərəfindən məktəbli formasının pulsuz verilməsi müəyyənləşməyib: "Bu il dolların qiyməti ilə bağlı xammalın alış qiymətində artım var. Məktəbli formalarının qiyməti 8 faiz civarında bahalaşıb. 37 manat məktəbli formasının tikilişi ilə bağlı xərcləri ancaq ödəyir. Amma bununla belə BTE tərəfindən hər il şəhid, əlil, Milli Qəhrəman, aztəminatlı ailələrin övladlarına pulsuz məktəbli formaları verilir. Bu il nə qədər pulsuz məktəbli formasının ayrılacağı rəhbərliyin qərarından asılıdır. Amma artıq Qusarda 30 imkansız ailəyə pulsuz məktəbli forması verilib. Bu, "Azərbaycan Valideyn-Müəllim Assosiasiyası”na edilmiş müraciət əsasında baş tutub. Millət vəkilləri, iş adamları da sözügedən ailələrə məktəbli forması alaraq pulsuz paylayırlar. Bizim də imkanımız daxilində "Azərbaycan Valideyn-Müəllim Assosiasiyası”na edilmiş müraciətlər əsasında pulsuz məktəbli forması ayıracağıq. Amma bu nə qədər olacaq, bu barədə rəhbərlik qərar verəcək. BTE güzəştli şəhid,əlil, aztəminatlı ailələrin uşaqlarının təhsilə marağının azalmaması, bu ailələrdə böyüyən uşaqlara dəstək üçün hər il olduğu kimi bu il də bu xeyirxah missiyasını yerinə yetirir və yeni dərs ili başlayanadək bu koorparativ məsuliyyətini yerinə yetirəcək”.
"Azərbaycan Valideyn-Müəllim Assosiasiyası” İctimai Birliyinin icraçı direktoru Təranə Şərifova da xəbəri təsdiqləyərək bildirib ki, indiyədək İctimai Birliyə xeyli sayda müraciət daxil olub: "Bizim BTE ilə müqaviləmizə əsasən imtiyazlı ailələrin övladlarına məktəbli forması tikiş müəssisəsi tərəfindən pulsuz verilir. Bu güzəştli kateqoriyaya şəhid, Milli Qəhrəman, əlil və aztəminatlı ailələrinin uşaqları daxildir. Artıq Qusarda 2 saylı məktəbdə təhsil alan imkansız uşaqlara pulsuz məktəbli forması göndərilib. Bu il nəzərdə tutmuşuq ki, əsasən bölgələrdən edilən müraciətlərə daha çox yer verək. Çünki, neçə ildir ki, əsasən Bakı məktəblərində təhsil alan şagirdlərə formalar pusuz verilir. Bütün bunlarla yanaşı, "Azərbaycan Valideyn-Müəllim Assosiasiyası” İctimai Birliyinə pulsuz məktəbli forması almaq üçün edilən hər bir müraciət araşdırılır. Biz onlardan güzəştli kateqoriyaya aid olduğunu təsdiqləyən rəsmi sənəd tələb edirik. Əgər ailədə valideynlərdən birinin şəhid, əlil, Milli Qəhrəman statusu varsa və yaxud aztəminatlı ailə kimi rəsmi qeydiyyatdadırsa, biz həmin sənədləri ondan tələb edirik. Həmin sənədlər "Azərbaycan Valideyn-Müəllim Assosiasiyası” İctimai Birliyinə edilən müraciətlə birlikdə BTE-yə göndəririk. BTE tərəfindən bu kateqoriyadan olan ailələrin övladlarına məktəbli forması pulsuz olaraq verilir. Bu xeyirxah işin arxasında təhsilə, imtiyazlı ailələrin uşaqlarına dəstək missiyası dayanır. Sağ olsun BTE bizim təşəbbüsümüzə dəstək verərək artıq beş ildən çoxdur ki, güzəştli ailələrə məktəbli formasının pulsuz verilməsini həyata keçirir. Hazırda müraciətlər davam edir”./Movqe.az/
