Danimarkanın paytaxtı Kopenhagendə inşaatı başa çatan “İmam Əli” məscidinin açılışı olub. “Anadolu” agentliyinə istinadən verilən məlumata görə, əsasən müsəlmanların yaşadığı Norrebroda tikilən məbəd ölkədə şiələrə aid ən böyük məsciddir. Bildirilir ki, ümumi olaraq 2 100 kvadratmetrlik sahədə tikilən qoşa minarəli məsciddə eyni anda minlərlə mömin ibadət edə bilər. Məbədin açılışı yerlilər tərəfindən böyük maraqla qarşılanıb.
Açılışda çıxış edən iranlı Şeyx Nisar məscidlərin ibadət yeri olmaqla yanaşı həm də təhsil və təlim mərkəzləri olduğunu deyib: “Buralarda insanlar birlikdə yaşamağı, sevgini və hörməti öyrənirlər. Məscidlər həmçinin həmrəyliyin və yardımlaşmanın mərkəzidir. Məscidlər həm də insanların hər mövzuda məsləhətləşmək üçün bir insan tapabiləcəyi yerlərdir. Siz, müsəlmanlar və qeyri-müsəlmanlar, hər mövzuda bizə müraciət edin.”
Məscidin 60 milyon krona (9 milyon USD) başa gəldiyi bildirilir. /anspress/
