Çeçenistan başçısı Ramzan Kadırovun “Instagram” hesabinda müxalifətçi Mixail Kasyanovla bağlı yaydığı videoçarx Rusiyanı qarışdırıb.
Məlumata görə, videodan görünür ki, Kasyanov snayperlə nişana alınıb. Çeçenistan liderinin yerləşdirdiyi videoda "Kasyanov Strasburqa Rusiya müxalifəti üçün pul yığmağa yollanıb, anlamayan anlayacaq", şərhi yazılıb.
Məsələylə bağlı açıqlama verən Rusiya prezidenti Vladimir Putinin mətbuat katibi Dmitri Peskov vəziyyəti gərginləşdirməməyə çağırıb.
"Səmimi danışsaq, biz “Instagram”ı mütəmadi olaraq izləmirik, xüsusən də Kadırovun “Instagram” hesabinı. Sözsüz ki, mən KİV-də bu xəbərləri gördüm. Biz orda nə haqqında söhbət getdiyinə baxacağıq və düşünürəm axşam nəsə cavab verə biləcəyəm", - deyə Peskov bildirib.
Rusiyanın “Parnas” partiyasında Kasyanovun həmkarı İlya Yaşin yayılan videonun birbaşa ölümə təhdid olduğunu bildirib. Yanvar ayının ortalarında Kadırov Rusiyanın qeyri-sistemli müxalifətini ölkənin siyasi quruluşuna zərbə vuran "xalq düşmənləri" adlandırmışdı. Ramzan Kadırovun təxribatçı fəaliyyətə görə onların mühakimə olunmalı olduğunu qeyd etmişdi. Bu fikirlər hüquq müdafiəçiləri və müxalifətçilər tərəfindən kəskin tənqidlə qarşılanmışdı.
Çeçenistan xəritədə
Onu da qeyd edək ki, sözügedən video artıq Kadırovun "İnstagram" hesabından yığışdırılıb./anspress/
