Suriya prezidenti Bəşər Əsədin devrilməsi ilə bağlı Türkiyə prezidenti Rəcəb Tayyib Ərdoğanın bəyanatı Türkiyənin tarixi baxışı ilə bağlı ola bilər.
“İnterfaks” agentliyinə istinadən xəbər verilir ki, bunu Rusiyanın Liberal-Demokratik Partiyasının lideri Vladimir Jirinovski deyib.
“Türkiyənin Suriya ilə münasibətləri bizim Krımla münasibətlərimiz ilə eynidir. Onlar Osmanlı imperiyasının bir hissəsi olaraq Şimali İraq kimi Şimali Suriyanın hansısa hissəsini özünə qaytarmaq istəyir”, - siyasətçi deyib.
O, əlavə edib ki, Rusiya hakimiyyəti Türkiyəni dəstəkləməyəcək: “Çünki Əsəd qanuni seçilmiş prezidentdir və Rusiyanın müttəfiqidir”.
Jirinovski həmçinin bildirib ki, Ərdoğanın sözləri Avropa İttifaqı ilə münasibətləri yaxşılaşdırmaq məqsədi daşıyır: “Yəni, mən NATO-da qalıram, Əsədi devirəcəyəm, amma siz məni dərhal Avropa İttifaqına götürün, Şengen zonasını açın və bütün qaçqınları Suriyaya geri qovacağam. Brüssel bu sazişə gedə bilər”.
Eyni zamanda partiyanın lideri hesab edir ki, Rusiya-Türkiyə əlaqələri və Türkiyənin Suriya ilə bağlı xarici siyasətini ayırmaq lazımdır.
Qeyd edək ki, noyabrın 29-da Türkiyə prezidenti Türkiyə ordusu Bəşər Əsədin hakimiyyətinə son qoymaq üçün Suriyada hərbi əməliyyata başladığını bildirib./Publika.az/
