İŞİD terrorçu qruplaşmasının Xorasan şəhəri adlandırdığı Əfqanıstan və Pakistan bölgəsində qruplaşmanın lideri Hafiz Səid öldürülüb.
Məlumata görə, bu barədə Əfqanıstan kəşfiyyatı təşkilatı xəbər yayıb.
Hafiz Səid Əfqanıstanın şərq hissəsində olan Nəngərhar şəhərində hava hücumu nəticəsində ölüb.
Xəbərə görə, NATO qüvvələri dünən bölgədə xüsusi əməliyyat həyata keçirib. Hafiz Səidlə yanaşı 30 terrorçu da məhv edilib.
NATO hərbçiləri Əfqanıstanda xüsusi əməliyyatdan sonra / FOTO: Associated Press
Talibançılar İŞİD-ə qoşulur.
Son bir ildə Əfqanıstanın cənub-şərq bölgələrində bəzi taliblər İŞİD terrorçularına qoşulub. Bu isə İŞİD-çilərin sayının ölkədə kəskin şəkildə artmasına səbəb olub. Əfqanıstan kəşfiyyatının əldə etdiyi məlumata görə bu ölkədə fəaliyyət göstərən İŞİD-çilərin liderlərinin çoxu xarici dövlətlərdən olan şəxslərdir.
Son vaxtlar Əfqanıstanın şərq bölgələrində İŞİD və Taliban arasında şiddətli döyüşlər gedir. Bəzi bölgələrdə isə döyüşlərdən bezən əhali evlərini tərk edərək başqa yerlərə köçüblər.
Əfqanıstanda olan ABŞ qüvvələri tərəfindən son günlərdə Pilotsuz Uçan Aparatlar vasitəsilə terrorçuların mövqeləri bombardman edilir.
Ötən həftə də ölkənin Nəngərhar şəhərində ABŞ-ın PUA-ları tərəfindən edilən hücumlar nəticəsində İŞİD-in Əfqanıstandakı iki nömrəli adamı olaraq tanınan Gül Zaman öldürülüb. Eyni gündə Nəngərhar şəhərində PUA-ların hücumu zamanı 49 İŞİD-çi məhv edilib.
İŞİD terrorçuları İraq və Suriyada bir sıra böyük şəhərləri ələ keçirib / FOTO: Associated Press
İraq və Suriya ərazisində fəaliyyət göstərən silahlı paramilitar qruplaşma olan İŞİD 2014-cü il yanvarın 3-də müstəqilliyini, 2014-cü il iyunun 29-da isə yeni xilafət yarandığını elan edib.
2006-cı ildə ABŞ kəşfiyyatının hazırladığı hesabatda təşkilatın üzvlərinin sayının 1000-dən yuxarı olduğu bildirilirdi. 2011-ci ildən etibarən ABŞ ordusunun İraqdan çıxmasından sonra təşkilat üzvlərinin sayının 2 dəfədən çox artdığı haqqında məlumatlar var idi./anspress/
İŞİD terorçuları əsasən neftlə zəngin ərazilərə hücum edir / FOTO: Associated Press
