Prezident İlham Əliyev ölkəmizdə səfərdə olan Gürcüstanın Baş naziri Giorgi Kvirikaşvili ilə görüşüb.

Qazeta.info bildirir ki, qonağı salamlayan Prezident İlham Əliyev Giorgi Kvirikaşvilinin Azərbaycanda hələ Baş nazir olmazdan öncə tez-tez olmasını xatırladaraq Baş nazir kimi səfər etməsindən çox şad olduğunu vurğulayıb.

Bu səfərin gələcəkdə münasibətlərimizin möhkəmlənməsinə xidmət edəcəyini bildirən Prezident " Münasibətlərimiz tarixə, qardaşlığa, xalqlarımızın yaxın qonşuluğuna əsaslanır.

Bu gün biz bütün sahələr üzrə - siyasi sahədə, iqtisadi sahədə fəal dialoq aparırıq. Bizi uğurla inkişaf edən, ölkələrimizə və xalqlarımıza fayda gətirən həm nəqliyyat, həm də energetika sahələrində layihələr birləşdirir. Biz ölkələrimiz arasında ikitərəfli münasibətlərin inkişafından çox məmnunuq. Əminəm ki, Sizin səfəriniz gələcək əlaqələrimizin dərinləşməsinə, möhkəmlənməsinə xidmət edəcək. Bizi tarix, coğrafiya, maraqların üst-üstə düşməsi və mənim artıq qeyd etdiyim kimi, iri transmilli energetika, nəqliyyat layihələri birləşdirir. Bu layihələrin reallaşmasından, uğurlu fəaliyyətindən ölkələrimizin və xalqlarımızın rifahı, həm də regionumuzdakı sabitlik asılıdır. Bir daha xoş gəlmisiniz." deyə bildirib.

Gürcüstanın Baş naziri Giorgi Kvirikaşvili Azərbaycan Prezidentinə xoş münasibətini çatdıraraq həqiqətən qardaş ölkədə olmasından çox şad olduğunu bildirib. "Xalqlarımızı çoxəsrlik dostluq bağlayır. Biz həqiqətən də strateji xarakter daşıyan münasibətlərimizin gələcək inkişafını hərtərəfli dəstəkləyirik. Sizin artıq qeyd etdiyiniz kimi, bizi xalqlarımızın rifahının yaxşılaşdırılması üçün vacib olan və xalqlarımız arasında gələcək dostluğun möhkəmləndirilməsinə xidmət edən dostluq, strateji, regional, qlobal xarakterli layihələr bağlayır. " deyə qeyd edən G.Kvirikaşvili  Azərbaycan Prezidentinə təşəkkürünü bildirib.

Görüşdən sonra Azərbaycan Prezidenti İlham Əliyevin adından Gürcüstanın Baş naziri Giorgi Kvirikaşvilinin şərəfinə işçi nahar verilib.