Türkiyənin cənub-şərq vilayətlərində PKK silahlılarının iştirakı ilə daha bir neçə zorakılıq faktı qeydə alınıb.
Diyarbəkir vilayətində silahlılar həbsxanaya hücum edib, orada saxlanılan məhbusları sərbəst buraxmağa çalışıblar. Hücum zamanı polislə silahlılar arasında atışmalar olub. Bir qədər sonra silahlıların dağlara qaçdığı, hadisə nəticəsində insan itkisinin baş vermədiyi bildirilir.
Şırnaq vilayətinin Cizrə rayonunda küçəyə çıxmaq qadağası aradan qaldırıldıqdan sonra Xalqların Demokratik Partiyası tərəfdarlarını aksiyaya toplayıb. Partiyanın sədri Səlahəddin Dəmirdaş çıxışı zamanı qeyd edib ki, Türkiyə hökuməti bölgədə yaşanan gərginliyin qarşısını top-tüfəng yerinə, ikicə gün danışıqlara getmək həll edə bilər.
“Yaşanan hadisələrə baxmayaraq, yenə də sülh tərəfdarı olduğumuz üçün Ankarada ağlını itirmiş çılğınlar bizim sülh niyyətimizi təslimiyyət kimi qəbul edirlər. Sülh çağırışlarını dəyərli bir iradə, təfəkkür əvəzinə, çarəsizlik kimi qəbul edirlər”, deyə Səlahəddin Dəmirdaş bildirib.
Türkiyənin baş naziri Əhməd Davudoğlu PKK-nın fəaliyyətini İŞİD terrorizmi ilə müqayisə edib.
“Biz avqust ayının 28-indən etibarən anti-İŞİD koalisiyası tərkibdinə bu qruplaşmaya qarşı mübarizə aparırıq. Müxtəlif terror qruplaşmaları arasında bir fərq qoymaq doğru deyil. Bəzi müttəfiqlərimiz İŞİD-lə PKK-nı bir-birindən ayırırlar. Heç bir dini, milli və ya mədəni fərqlilik terror haqq qazandıra bilməz. Hər cür terrorizmə qarşı çiyinə-çiyinə mübarizə aparmalıyıq”, deyə Əhməd Davudoğlu bildirib.
Son iki ayda Türkiyədə PKK ilə mübarizə fonunda 1-dən çox silahlı zərərsizləşdirilib./anspress/
