Milli Təhlükəsizlik naziri Eldar Mahmodovun qudası- Beynəlxalq Bankın keçmiş rəhbəri Cahangir Hacıyev Mütəşəkkil Cinayətkarlığa Qarşı Mübarizə İdarəsinə (“Bandotdel”) çağırılıb.
Bildirək ki, bu barədə virtualaz.org saytı məlumat yayıb.
Saytın verdiyi məlumata görə, Cahangir Hacıyev “Bandotdel”ə çağırılsa da həbs edilməyib. O, ancaq ifadə verib.
Beynəlxalq Bankın sabiq rəhbəri “kredit oliqarxları”nın işi ilə əlaqədar çağırılıb və sorğu-sualdan sonra dərhal da azad edilib.
Cahangir Hacıyev martın 18-də Azərbaycan Beynəlxalq Bankının idarə heyətinin sədri vəzifəsindən istefa verib. Cahangir Hacıyev ölkənin ən məşhur və ən təcrübəli bankirlərindən biri sayılırdı. Onun istefasının rəsmən açıqlanan səbəbləri və irəli sürülən iddialar bir-birindən kəskin fərqlənirdi.
Belə ki, Beynəlxalq Bankın yaydığı rəsmi məlumatda, Cahangir Hacıyev səhhətilə əlaqədar tutduğu vəzifədən istefa verdiyi və idarə heyətinin onun ərizəsini təmin etdiyi bildirilirdi. İdarə heyəti sədri vəzifəsini isə müvəqqəti olaraq birinci müavin, Emil Mustafayev icra etməyə başlamışdı.
May ayının 20-də isə C. Hacıyev Daxili İşlər Nazirliyinin Mütəşəkkil Cinayətkarlıqla Mübarizə İdarəsinə çağırılmışdı. Onun dindirilməsi ölkənin tanınmış oliqarxlarının həbsi ilə bir müddətə təsadüf edirdi./anspress/
