Rusiay ilə İran hökumətləri müştərək bank yaratmağa hazırlaşırlar. Məlumata görə, bu barədə Rusiya - İran hökumətlərarası komitəsinin həmsədr müavini Mehdi Möhtəşəmi verdiyi açıqlamada bildirib. Möhtəşəmi rəsmi Moskvanın irəli sürdüyü “müştərək bank” təklifini qəbul etdiklərini deyib.
“Müştərək bank yaradılması hökumətlərarası komitənin hədəflərindən biri idi. Təklifi Rusiya tərəfi irəli sürdü və Mərkəzi bank bu təklifi dəyərləndirdi. Müştərək bankın yaradılması üçün İranda da razılığa gəlindi.”
Möhtəşəmi bildirib ki, İran bankları sanksiyalara məruz qaldığından müştərək bank fikri rəsmi Tehran üçün çox əhəmiyyətlidir.
“Müştərək bank sayəsində iki ölkə arasında ticari əməkdaşlıq çoxalacaq. Bankın yaradılmasına etiraz edən yoxdur, amma təfərrüatlar araşdırılmalıdır.”
İlkin olaraq bankın 500 milyon dollarlıq sərmayə ilə yaradılacağını deyən Möhtəşəmi, müştərək bankın iki ölkə arasındakı ortaq layihələrə investisiya qoyacağını vuruğulayıb.
Rusiyanın energetika naziri Aleksandr Novak oktyabrda Tehrana rəsmi səfəri zamanı ölkəsinin İranla müştərək investisiya layihələrində istifadə etmək üçün ortaq bank yarada biləcəyini demişdi.
