Bu gün Bakıda Birinci Milli BMT Modeli Konfransına start verilib. Tədbir Gənclər və İdman Nazirliyi ilə BMT-nin İnkişaf Proqramının birgə əməkdaşlığı çərçivəsində keçirilir.
Konfransda Azərbaycanın gənclər və idman naziri Azad Rəhimov, mədəniyyət və turizm naziri Əbülfəs Qarayev, təhsil naziri Mikayıl Cabbarov, BMT-nin İnkişaf Proqramının Azərbaycanda rezident nümayəndəsi Ercan Murat, ABŞ-ın Azərbaycandakı səfiri Robert Sekuta, çoxlu sayda gənclər və digər qonaqlar iştirak edib.
Azad Rəhimov birdirib ki, gənclər Azərbaycanın gələcək inkişafı üçün əsas qüvvədir. Bu baxımdan Azərbaycanda gənclərin qərarların qəbul edilməsində fəal iştirakının təmin edilməsi çox vacibdir. "Bizim prioritetimiz təhsilli və vətənpərvər gənclər yetişdirməkdir".
BMT-nin İnkişaf Proqramının Azərbaycanda rezident nümayəndəsi Ercan Murat bildirib ki, Azərbaycan gənclər siyasətinə mühüm əhəmiyət verir.
Daha sonra mədəniyyət, təhsil nazirləri, eləcə də Milli Məclisin Gənclər və idman komitəsinin sədri Fuad Muradov çıxış edib.
İyirmidən çox ali təhsil müəssisəsi və orta məktəbdən 350 gəncin iştirak etdiyi konfrans fevralın 23-də başa çatacaq. Layihənin əsas məqsədlərindən biri Azərbaycanda BMT Modeli (MUN) hərəkatının institutlaşdırılması, universitetlərdə MUN klublarının təsis edilməsi və onları birləşdirəcək MUN şəbəkəsinin (Model UN Network) yaradılmasıdır. BMT Modeli tələbələrə diplomatiya və əməkdaşlıq dünyasını təsvir edən BMT Baş Assambleyası, BMT Təhlükəsizlik Şurası və digər BMT qurumlarının real həyat simulyasiyasıdır. BMT Modelində tələbələr təşkilatın gündəliyindəki cari məsələlər üzrə müzakirələr aparırlar. Tələbələr problemləri həll etmək üçün beynəlxalq əməkdaşlığın səfərbərliyi naminə qətnamə layihəsi, strategiya planı hazırlayır, tərəfdaşlar və rəqiblərlə danışıqlar aparır, münaqişələri həll edirlər.
Gənclər və idman naziri Azad RəhimovBakıda Birinci Milli BMT Modeli Konfransının açılışı./anspress/
