Azərbaycanlı biznesmen Canpolad Şamiloğlunun ölümünə “qanuni oğru”lar arasında göyərti bazarına nəzarəti ələ keçirmək üçün gedən “müharibə” səbəb olub.
Bildirək ki, bu barədə “Rosbalt” yazıb.
“Paytaxtın piştaxtalarında satılan hər dəstə şüyüd, kişniş, vəzəri, cəfəri və s. göyərtilərin demək olar ki, hər dəstəsi Canpoladın əlindən keçirdi”, -deyə hüquq-mühafizə orqanlarındakı mənbə “Rosbalt”-a bildirib.
O, faktiki olaraq “Göyərti kralı” hesab olunurdu və onların topdansatının bütün mərhələlərinə nəzarət edirdi.
Agentliyə məlumat verən mənbə bildirib ki, C.Şamiloğlu son vaxtlar “qanuni oğru” Vaqif Süleymanovla yaxınlıq edib. Məlumata görə, həmin Vaqif Süleymanov hazırda məhz göyərti biznesi uğrunda digər “qanunu oğru” Rövşən Lənkəranskinin adamları ilə, sözün həqiqi mənasında, müharibə aparır.
C.Şamiloğlu məhz bu müharibənin qurbanı olub.
Məlumata görə, 46 yaşlı azərbaycanlı biznesmen Canpolad Şamiloğlu martın 17-nə keçən gecə öldürülüb.
Hadisə Moskvanın qərbində baş verib. Cinayətkarlar ona yeraltı avtodayanacaqdan çıxıb evinə gedərkən hücum ediblər. Biznesmen dörd güllə ilə vurulub. Onun cəsədi səhər saatlarında həyat yoldaşı tərəfindən aşkarlanıb. Qonşuları bildiriblər ki, saat 03 radələrində səs-küy və atəş səslərini eşidiblər, amma heç kim küçəyə çıxmayıb.../virtualaz.org/
