Bakı Ekspo Mərkəzində təşkil olunan "ADEX 2016" İkinci Azərbaycan Beynəlxalq Müdafiə sərgisində Azərbaycan Müdafiə Sənayesi Nazirliyinin istehsalı olan "Gürzə" zirehli avtomobilinin yeni modeli nümayiş etdirilir.
Müdafiə Sənayesi Nazirliyinin əməkdaşı Mahir Bayramov Trend-ə avtomobilin yenilikləri barədə məlumat verib: "Avtomobil "TOYOTA HILUX 4X4" markalıdır. Avtomobilin motoru 2500 kubmetrdir. Modelin adi "Gürzə" zirehindən fərqi odur ki, onun üstündə 3 silah - NSV-12,7 pulemyotu, AQS-30 tipli qumbaraatan və tank əleyhinə idarə olunan qurğu yerləşdirilə bilər. Həmin silahlar avtomobildə 3 dəqiqə ərzində dəyişdirilir. Bundan başqa, avtomobilin sağ və sol qapılarında iki pulemyot yerləşdirilir".
M.Bayramov deyib ki, avtomobilin uzunluğu 5270 mm, eni 1680 mm, hündürlüyü isə 2120 mm-dir. Avtomobil 2000 metrdən hədəfi dəqiq nişan almağa və 4000 metrdə hədəfi vurmağa qadirdir.
O əlavə edib ki, avtomobildə quraşdırılan 7.62 mm-lik pulemyotla dəqiqədə 800 atəş açmaq, 1500 metrdə hədəfi nişan almaq mümkündür: "Sifariş əsasında "Gürzə"nin gülləkeçirməz zirehli modeli də istehsal olunur".
