2014-cü iyulundan başlayaraq neftin qiymətində baş verən ucuzlaşma bu gün neft ixrac edən ölkələrin büdcəsində artıq hiss olunmaqdadır. Məlumata görə, bunun üçün isə çıxış yolu neftin ixracını azaltmaqdır.
Qara qızılın ucuzlaşmasından əziyyət çəkən Rusiya bununla bağlı OPEC-lə danışıqlar aparmağa hazırlaşır. Məhz mütəxəssislərin də bu görüşdən gözləntiləri çoxdur.
Rusiyanın neft ixrac edən ölkələrin təşkilatı OPEC-lə danışıqları neftin qiymətinə əhəmiyyətli dərəcədə təsir edə bilər. Rusiyanın energetika naziri Aleksandr Novak bir müddət əvvəl bəyan etmişdi ki, neft hasilatının azaldılması məsələsini müzakirə etmək üçün OPEC və Səudiyyə Ərəbistanı ilə danışıqlara hazırdır.
Təkcə bu bəyanatdan sonra neftin qiyməti oynadı, başqa cür desək, nisbətən bahalaşdı. Görüş olacağı təqdirdə vəziyyət 180 dərəcə dəyişə bilər. Söhbət dünya bazarında tələblə təklifin balanslaşdırılmasından gedir. Dünyanın bu gün düşdüyü vəziyyət hasilatın tələbatdan çox olmasıdır.
Bu da neft ölkələrinə, o cümlədən Azərbaycana da təsirsiz ötüşməyib. İqtisadçıların qənatincə, Rusiya-OPEC danışıqları Azərbaycan üçün çox vacibdir. Bu hasilatın azaldılması barədə razılıq neftin qiyməti 60-70 dollaradək artıra bilər.
Oktay Haqverdiyev - iqtisadçı ekspert
"Azərbaycanın neft bazarında çəkisi heç bir faiz deyil. Sadəcə orada nə proseslər gedəcəksə, biz ona tabe olacağıq. Hasilat azalsa bu biizm xeyirimizə olacaq, qiymət artacaq. Biz də qazanacağıq", - iqtisadçı ekspert Oqtay Haqverdiyev bildirdi.
İqtisadçı bildirir ki, məsələ iqtisadi deyil, geosiyasi maraqlarla bağlıdır. Neftin ucuzlaşmasının arxasında Rusiyanı çökdürmək planları dayana bilər. Müharibə vəziyyətlərində neft bahalaşır, lakin Suriya, İraq kimi qaynar müharibə nöqtələrinin olmasına baxmayaraq, yanacaq uzuclaşmadadır.
Hazırki durumdan qazanan yalnız nefti ucuz idxal edən dövlətlərdir. Dünyanın qabaqcıl nəşrləri yazır ki, bir il yarımdır ki, Səudiyyə və Rusiya neft qiymətlərinin uçurumdan xilas edilməsi üçün məsləhətləşmələr keçirirlər, konkret nəticə isə yoxdur.
OPEC-in əsas oyunçusu Səudiyyə krallığı əvvəllər də dəfələrlə bildirib ki, neft hasilatını yalnız o halda azalda bilər ki, qeyri-OPEC ölkələri, konkret Rusiya da öz hasilatını azaltsın. Dünyanın gözü bu görüşə dikilib./anspress/
