Abşeron rayon İcra Hakimiyyətinin nümayəndələri jurnalist, Teleqraf.com saytının əməkdaşı Hacı Zeynalovun 4-5 ildir min bir əziyyətlə tikdiyi və hələ də başa çatdırmadığı evini dağıdıb.
Qazeta.info Modern.az-ın məlumatına əsasən bildirir ki, bu barədə jurnalistin dostları məlumat veriblər. Jurnalistin ev tikməklə bağlı Abşeron rayon İcra Hakimiyyətinin razılıq sənədi, memarlığın təsdiq etdiyi sənədlərinin qaydasında olduğu bildirilir.
Qeyd edilir ki, həmin sənədlər jurnalistə Abşeron rayon İcra Hakimiyyətinin sabiq başçısı Zakir Fərəcovun vaxtında verilib. Hazırda isə Abşeronun icra başçısı İradə Gülməmədovadır.
Jurnalistin dağıdılan evi Saray qəsəbəsində tikilib. Məlumata görə, o, evi tikdirmək üçün bir neçə dəfə bankdan kredit götürüb və hələ də həmin kreditləri ödəyə bilməyib.
Modern.az saytı Abşeron rayon İcra Hakimiyyətinin məsələylə bağlı mövqeyini öyrənə bilməyib.
